CEBU, Philippines - Pormal nga giila sa mga kabanay ang usa ka babaye nga napalgang nadugta na didto sa Sitio Buot, Barangay Punta Engano dakbayan sa Lapulapu sa milabay’ng buntag.
Ang biktima mao si Jocelyn Barong, 28, dalaga (may duha ka anak) nga taga Barangay San Vicente, isla sa Olango, dakbayan sa Lapulapu.
Ang miila ni Barong mao ang iyang igsoon nga si Leonarda Barong Marmojada pinaagi sa mga senina nga gisulod sa bag sa biktima ug ang bag mismo niini.
Matud pa ni Marmojada nga niadto pang Novembre 1, 2010 nawagtang si Barong human kini kuhaa sa iyang ig-agaw gikan sa Olango niadtong Oct. 31 ning tuiga.
Ang mikuha sa biktima mao si Pedro Taneo kay pabantayon sa anak niini nga na-hospital sa dakbayan sa Lapulapu.
Matud pa ni Taneo nga gumikan sa disco sa Barangay San Vicente Isla sa Olango matag adlaw sa minatay, nagdali og pauli si Barong hinungdan nga wala na silay nahimo gawas sa paghatag og pagtugot niini.
Apan ang mga kabanay ni Barong nahibulong nganong wala gyud makauli ang biktima hangtod nga ila nalang nasayran pinaagi sa taga media kalabot sa usa ka babaye nga napalgang patay didto sa Barangay Punta Engano hinungdan nga ilang gisusi ang punerarya.
Si SPO2 Rolito Jumao-as dili pa mokonpirmar kung aduna bay foul play ang kamatayon ni Barong bisan pa kung panty nalang ang diha sa lawas niini dihang nadiskobrehan.
Nasuta ni Jumao-as nga ang dapit diin mapalgi ang patay’ng lawas sa biktima maoy dapit nga pundokanan sa mga drug addict.
Nagduda ang kabanay ni Barong nga gipanamastamasan ang biktima sanglit dili kini suhito sa mga dapit sa dakbayan sa Lapulapu gumikan kay wala kini igong grado sa pagtoon.
Samtang ang kapolisan nagpaabot usab sa resulta sa awtopsiya sa patay’ng lawas ni Barong. (BANATNEWS)