VECO nag 'management blackout' - Mahilum

CEBU, Philippines - Namasangil ang mga kawani sa Visayan Electric Company (VECO) nga sakop sa union nga ang ilang kompanya mipatuman og ‘management blackout’ ug wala na mohatag og trabahuon sa mga kawani.

Kini human wala nay bisan usa ka kawani nga sakop sa union nga mi-report sa trabaho kagahapon ang gitugutang makagawas ug wala say ‘work orders’ nga gihatag ang management sugod kagahapon sa buntag.

Ang gitaktak nga presidente sa Visayan Electric Company Employees Union (VECEU-ALU-TUCP) Casimero Mahilum mipasangil nga dili seryoso ang management nga mahilot ang ilang kasungian.

Kini bisan pa og dunay gitakdang mediation hearing ang National Mediation and Conciliation Board (NCMB) karung petsa 10 ning bulana.

Gihulagway ni Mahilum ‘mind conditioning’ ang gihimo karun sa management aron silang mga kawani sa union ang dauton ug pasanginlan nga maoy mihimo og ilegal nga aksyon sa higayun nga dunay mahitabong blackout sa franchise area sa VECO.

Ang mga sakop sa union mibahad nga molusad sila og strike kun dili gyud mahilot ang ilang kasungian batok sa kompanya.

“Ako lang ipaabot nga ang management mura’g ni-engage og management blackout, kay tanang mga member sa union wala nay gitugutan nga makagawas, gikuhaan na og mga tools, hawan na ang mga computer sulod sa office, wala nay mga work orders nga gihatag, bisan gani og ongoing pa ang sabot-sabot karung petsa 10,” pasangil pang Mahilum.

Daling gihimakak sa management sa VECO ang maong pasangil ug midugang nga usa lang kini ka ‘black propaganda’ sa mga miyembro sa union.

Ang tigpamaba sa VECO, Ethel Natera, dihang nahinabi sa Banat News miingon nga pulos bakak ug way basehanan ang maong mga pamasangil ni Mahilum.

Giklaro ni Natera nga hangtud kagahapon pabiling normal ang ilang operasyon ug walay bisan usa sa mga kawani nila nga sakop sa union nga gitanggong ug wala na hatagi og mga work orders.

Matud ni Natera nga walay laing katuyoan ug tumong ang maong mga pamasangil ni Mahilum kondili mao ra gyud ang pagdaut sa management sa VECO.

Bisan pa niini gipadayag ni Natera nga pabiling seryoso ang VECO management ug padayong mokooperar sa gitakdang mediation hearing sa NCMB karung petsa 10 aron paghilot sa maong kasungian.

Subling gipasalig ni Natera nga andam na ang management aron pagsiguro nga way pagkapakgang sa suplay sa kuryente sa ilang franchise area sa Metro Cebu kun madayon ang gibahad nga welga sa mga kawani nga sakop sa union. (BANATNEWS)