Bugan sa lalaki napusilan 'angol

CEBU, Philippines - Maayong pagkaigo sa bugan sa usa ka batan-on human kini pusila sa usa ka lalaki pasado ala-una sa kaadlawon kagahapon sa dalan Katipunan barangay Labangon.

Ang biktima nailhan nga si Jason Abanes, 19, molupyo sa maong lugar giingong nakaangkon og samad pinusilan sa pribadong bahin sa iyang lawas ug milapos kini ngadto sa iyang paa.

Samtang ang suspetsado nailhan nga si Robert Penaranda, tag-iya sa Esperanza Video Karaoke ug molupyo sa barangay Tayod lungsod sa Consolacion.

Base sa alegasyon sa biktima nga mao pay pagkanaog niya sa usa ka taxi uban sa iyang higala nga si Renante Sayson sa may eskina paatubang sa ilang panimalay dihang kalit lang nga mipatim-aw ang suspetsado.

 Apan sa kalit lang   mihulbot ang suspetsado sa iyang dalang armas ug mipabuto ngadto sa biktima ug maayong pagkaigo niini sa iyang bugan.

Dugang alegasyon sa biktima nga sa wala pa kini mahitabo, silang duha sa iyang higala midangop sa kapolisan ug mireklamo nga gikilkilan sila sa suspek, ang ilang reklamo miresulta sa ilang panag-atubang diha sa Punta Princesa Police Station alang sa husay.

Apan matud pa ni SPO2 Cristene Dacillo sa Punta Princesa Police Station nga wala nila kini maimbestigar og tarong tungod kay ang mga reklamante (mga biktima) wala nay planong mopasaka og kaso batok sa suspetsado.

Sa diha nga nahuman na sila og husay nag-iyahay na sila og pamauli ug giingong nagsunod ang suspek apan sa iyang pagkanaog sa taksi kalit kini namusil kaniya. Ang biktima nalandig sa Cebu City Medical Center.

Ang kapolisan mipahigayon og hot pursuit operation batok sa suspetsado sa ilang lugar sa lungsod sa Consolacion apan wala kini nila maabti. (BANATNEWS)