CEBU, Philippines - Gihugopan sa gatusan ka mga aplikante ang job fair nga gipasiugdahan sa Public Employment Office (PESO) sa kagamhanan sa lalawigan sa Sugbo nga gipahigayon niadtong miaging Domingo sa Cebu International Convention Center (CICC) sa dakbayan sa Mandaue.
Si Christopher Libaton, 37, taga Poblacion sa lungsod sa Carcar nga usa sa namasin sa maong job fair nga gipahigayon nga nahinabi sa Banat News miingon nga misalmot siya sa maong job fair sa pamasin nga madawat og trabaho sa gawas sa nasud.
Matud pa niya nga nagtrabaho na siya sa usa ka construction firm sa Sugbo isip mason apan ang iyang suweldo dili pa paigo alang sa matag adlaw nga panginahanglan sa iyang pamilya.
“Akong suwayan ang pangaplay sa gawas, basin na lang og madawat unya arang-arang ang suweldo nga madawat,” matud pa niini.
Ang pangulo sa PESO nga si Julius Chua nga nahinabi sa Banat News miingon nga mokabat sa 34 ka recruitment agencies alang sa panarbaho sa gawas sa nasud ang misalmot sa maong job fair.
Dugang pa niya nga naglakip sa mga trabaho nga gikinahanglan mao ang mason, pintor, panday welder ug uban pa.
Si Chua miingon nga karong Disyembre 5 aduna sila’y laing job fair apan niining tungura alang na sa lokal nga job openings. (BANATNEWS)