Lapu' kaps manumpa na apan...

CEBU, Philippines - Gikatakda ang pagpahigayon og mass oathtaking sa mga midaug nga barangay kapitan sa miaging Sangguniang Kabataan (SK) ug barangay election sa dakbayan sa Lapulapu karong Nobyimbre 12 niining tuiga.

Si Barangay Kapitan Leo Mercado sa barangay Pajo nga maoy kasamtangang presidente sa Association of Barangay Council (ABC) sa maong dakbayan ang lakip sa manumpa kinsa nasublian usab sa katungdanan.

Si Mercado nga nahinabi sa Banat News miingon nga ang malakip sa makasalmot sa mass oathtaking nga mga bag-o ug mga daan nga barangay kapitan nga kaalyado sa ilang grupo ug walay labot ang mga sakop sa oposisyon.

Pangulohan unya sa magtiayong sila si Mayor Paz Radaza ug Kongresista Arturo Radaza ang maong pagpanumpa.

Hinuon kadtong mga kapitan ug mga opisyales sa barangay nga nagpadayag nang daan sa pagtapon sa ilang grupo mahimo nilang tugutan nga makaapil sa maong mass oathtaking.

Gitataw niya nga sa 30 ka barangay kapitan sa dakbayan nga gilangkoban sa 19 sa mainland ug 11 sa Olango Island, ang duha lamang kanila ang tataw nga   anaa sa oposisyon nga naglakip kanila ni Kapitan Isabelito Darnayla sa barangay Basak ug Kapitan Nestor Paypa sa barangay Canjulao.

Ang laing bag-o nga mga barangay kapitan nga bag-ong miyembro sa ilang grupo mao sila si barangay Kapitan Remegio Oyao sa barangay Marigondon, Joselito Tibon sa barangay Suba Basbas ug barangay kapitan Virgilio Casio sa Pangan-an, isla sa Olango. (BANATNEWS)