DOH sayong mangampanya vs. pabuto

CEBU, Philippines - Pormal nga ilusad sugod karung buwana sa Department of Health kon DOH-7 ang kampanya batuk sa pagpataka og gamit sa mga firecrackers kon pabuto nunot ning nagsingabot nga Pasko ngadto na sa pagsugat sa Bag-ong Tuig.

Nunot niini gipahibawo ni DOH-7 director Susana Madarieta dihang nahinabi sa Banat News nga gitakdang makig-alayon ang ilang buhatan sa kapulisan ug mga Local Government Units (LGU) ug sa Department of Education (DepEd) alang sa pagpatuman sa maong programa.

Matud ni director Madarieta dunay dakung papel ning maong programa ang kapulisan, mga LGUs ug ang DepEd aron pagtumbok sa mga lugar nga ikonsiderar nga firecracker danger zone.

Tumong ug tuyo niini aron malikay sa mga kadaut sama sa aksidenteng pagka-angol kun mabuthan sa mga pabuto kun magpataka lang og gamit niini susama sa milabay’ng mga katuigan diin daghan ang mga pasyente nga nalandig sa tambalanan sa lain-laing dapit sa nasud ilabi na atol sa pagsugat sa Pasko ug Bag-ong Tuig tungod sa mga pabuto.

Laing katuyoan niini matud ni Madarieta aron malikayan usab ang mga motumaw nga sunog epekto sa pagpataka og pabuto.

Nasayran nga daghan nang mga higayon nga dunay motumaw nga mga alarma sa sunog diin ang hinungdan niini mao ang mga pabuto susama sa nahitabo sa dakbayan sa Mandaue sa milabay’ng tuig diin tulo ang namatay dihang mibuto ang mga gipang-display nga firecrackers niini atol gyud sa Pasko.  (BANATNEWS)