Babayeng nag-panty 'palgang patay sa kalibunan

CEBU, Philippines - Nagpaingon na sa pagkadugta ang patay’ng lawas sa usa ka wala hiilhing babaye nga napalgan diha sa sitio Buot, barangay Punta Engaño sa dakbayan sa Lapulapu alas-7 pasado kagahapon sa buntag.

Si SPO2 Rolito Jumao-as sa homicide section sa kapolisan sa maong dakbayan miingon nga ang maong patay’ng lawas sa babaye napalgan sa usa ka pribadong luna sa nahisgutang lugar.

Matud pa niya nga si Joel Gonzales, nga usa ka mangayohay og sapatos maoy unang nakakaplag sa maong patay’ng lawas nga nagbuy-od sa kasagbutan sa maong dapit.

Dugang pa niya nga ang maong patay’ng lawas sa babaye nagsul-ob og sleeveless,   nagsul-ob pa og panty ug sa tupad niini napalgan ang shoulder bag ug sapatos sa biktima.

Apan walay nakit-an ang kapolisan nga dokumento nga mag-ila unta sa biktima diha sa maong shoulder bag gawas lamang sa lipstick ug uban pa nga galamiton sa pagpaguwapa.

Wala pa usab matino sa kapolisan kun unsay gikamatyan sa biktima apan gikatakdang ipailawom ang patay’ng lawas sa awtopsiya pagtino sa gikamatyan niini.

Samtang nag-imbestigar pa ang kapolisan kabahin sa maong hitabo ilabi na pagtino kun si kinsa kini ug nganong naabot kini sa maong lugar nga nag-panty na lamang. (BANATNEWS)