2 ka tulisan nakuha sa CCTV camera

CEBU, Philippines - Ang duha sa tulo ka armadong lalaki nga nagtulis sa Boston Hardware sa dalan A.S. Fortuna sa barangay Banilad, dakbayan sa Mandaue sa miaging semana, nakuhaan og hulagway sa CCTV camera.

Kini ang nasayran sa Banat News gikan sa mga sakop sa Investigation Detection and Management Bureau (IDMB) sa follow up nga gihimo nila kagahapon.

Si Inspector Ramil Morpos nga maoy head sa IDMB mibutyag sa Banat News nga nagpadayon pa ang pakisusi nga ilang gihimo sa mga nagsunodsunod nga pagpanulis nga nahitabo sa dakbayan.

Matud pa niya nga gisumiter na sa tag-iya sa Boston Hardware ang kopya sa footage sa CCTV camera nga gipahimutang sa nahisgotang establisamento ug ang duha ka tulisang nakuhaan og footage, pulos    nagtaptap og panyo sa nawong ug nagsul-ob pa og crush helmet.

Base sa maong kopya nasayran nga sa tulo ka mga tulisan , duha kanila ang nakuha sa camera ug ang ikatulong kauban nila wala makuha kay malagmit nagsilbi kining look out didto sa gawas.

Si Mayor Jonas Cortes mitug-an sa Banat News nga nasagmuyo siya niining nagsunod-sunod nga tulis sa Mandaue karon.

Hinuon nasayran niya wala magmika ang mga polis sa Mandaue ug nagtuo siya nga sa dili madugay mapuhag ra gihapon ang mga pundok sa mga tulisan nga anaa mohimo sa ilang kalihokan sa Mandaue. (BANATNEWS)