Ex-US Navy kit-ang patay

CEBU, Philippines - Patay ang usa ka retiradong sakop sa US Navy human gikatahong kalit nga nawad-an sa panimuot ug natumba sa dapit sa iyang gi-abangang apartment sa Englis V. Rama barangay Guadalupe.

Ang namatay mao si Anthony Joseph Brown, 61, usa ka American national ug lumad nga molupyo sa Massachusetts, USA. Sa pakighinabi sa Banat News ni PO3 Ritchell Tejano sa Guadalupe Police Station mibutyag kini base sa blotter nga ang landlady sa maong apartment maoy mitawag sa ilang buhatan ug mipahibalo sa maong panghitabo.

Matud pa ni Tejano nga samtang nagtawag og polis ang landlady nagtawag usab Emergency Rescue Unit Foundation ang mga silingan sa biktima ug gidali kini pagdala sa Cebu City Medical Center apan gideklarar kini nga dead on arrival.

Sa pakighinabi usab sa Banat News sa landlady sa maong apartment nga nagdumili sa pagpahingalan mibutyag kini nga kapin na sa usa ka tuig nga nag-abang sa maong apartment si Brown. Base sa inisyal nga pakisusi sa lawas ni Brown wala kini nakitang mga samad o timailhan nga siya gipatay apan gikatakdang ipa-awtopsiya ang patay’ng lawas niini. (BANATNEWS)