CEBU, Philippines - Nasikop ang duha sa lima ka mga lalaki nga subject sa search warrant tungod sa paghupot og armas nga walay lisensya pasado alas-6 sa buntag kagahapon sa barangay Cantao-an lungsod sa Naga. Ang mga nasikop mao sila Ricky Prandas Plaza, 38, ug Pedro Paran Labandero, 46, nga pulos molupyo sa maong lugar, ang kapolisan nakasakmit og lima ka mga nagkalain-laing armas ug mga bala.
Nasayran nga ang grupo sa Criminal Investigation and Detection Group (CIDG-7) ug grupo sa Special Reaction Unit (SRU) mi-serve sa lima ka search warrant sa maong lugar batok unta sa lima ka tawo nga sila si Editho Sasan, Celestino Rabanes, Louie Caparazo ug ang duha nga nasikop.
Ang maong search warrant nga giluwatan ni RTC Branch 10 Judge Soliver Peras tungod sa ilang kalapasan sa paghupot ug mga armas nga walay lisensya. Sa diha nga nasikop na ang duruha, nakuha sa mga kamot ni Plaza ang STI Edge Caliber .45, usa ka kalibre .38 rebolber snubnose, usa ka kalibre sa .357 nga adunay usa ka buhing bala, duha ka magazine sa kalibre .45 nga adunay onse usab ka buhing bala, laing upat ka buhing bala sa kalibre .357.
Samtang nakuha usab sa mga kamot ni Labandero ang usa ka kalibre .45 nga Remington, usa ka homemade .38 rebolber, usa ka magazine nga adunay duha ka buhing bala sa kalibre .45 ug lima ka buhing bala usab sa kalibre .38.
Ang kapolisan wala makakuha og mga armas sa laing tulo ka subject sa ilang pagpangronda. Ang duruha nga nasikop sa kapolisan kasamtangang nagtingkagol sa buhatan sa CIDG-7. (BANATNEWS)