CEBU, Philippines - Gipasalig ni Kapitan Jun Caña sa barangay Ward 4, sa lungsod sa Minglanilla nga hatagan niya og libreng barangay clearance ang tanang aplikante og trabaho sa ilang barangay.
Si Cana kinsa usa ka sakop sa media nakadaog sa pagka-kapitan sa milabay nga piniliay niadtong Oktobre 25, 2010.
Gusto niya nga ang tanang nagpangita og trabaho kinahanglang dili pabayron sa lukaton nilang barangay clearance nga gamiton nila sa ilang pagpang-apply og trabaho.
Dugang pa ni Cana nga dako ang iyang pasalamat sa iyang katagibarangay sa Ward 4, sa ilang suporta nga naghatod kaniya sa kadaugan sa miaging piniliay.
Isip usa sa iyang pangalagad sa iyang katagi-barangay, gusto niyang librehon kini sa barangay clearance aron makatabang siya nga sila makakaplag og trabaho.
Sa ubang barangay pabayran ang mga barangay clearance nga lukaton sa mangita og trabaho.
Apan alang kang Caña nga kalipay niyang ialagad kining libre sa iyang mga konstituwente.
Gawas sa libre nga barangay clearance ialagad usab ni Caña ang libre nga pag-atiman sa panglawas sa katawhan pinaagi sa libreng mga tambal nga iyang itunol ngadto sa mga kabus nga molupyo sa iyang barangay.
Si Cana kanhi nag-alagad isip reporter sa The Freeman, Sun Star Daily, nahimo usab nga komentarista sa radyo ug nahimong consultant on information and development ni Gobernador Gwendolyn Garcia. – BANAT NEWS