CEBU, Philippines - Naangol ang tulo ka mga ulitawo dihang gipamusil kini sa duha ka wala hiilhing tawo nga nagsakay og motorsiklo didto sa Upper Zone Tamates sa barangay Paknaan, dakbayan sa Mandaue sa miaging kaadlawon.
Ang mga biktima mao sila si Dandred Amamangpang, 21, Gerry Montibon, 24 ug Nino Ortega, 21, pulos ulitawo ug managsilingan sa Paknaan.
Si PO3 Edgar Pasaylo sa kapolisan sa Presinto 3 sa Basak Police Station nga nahinabi sa Banat News miingon nga naglakaw nga namauli sa ilang panimalay ang mga biktima dihang gisakdapan sa motorsiklo nga giluwanan sa mga kriminal ug kalit lang namusil kanila.
Matud pa ni PO3 Pasaylo nga sa tulo ka mga biktima maoy grabeng naangol si Amamangpang kinsa naigo sa iyang tiyan ug gihatod dayon kini ngadto sa Vicente Sotto Memorial Medical Center sa dakbayan sa Sugbo.
Dugang pa ni PO3 Pasaylo nga si Ortega naigo usab sa kamot, samtang si Montebon nasabak sa tiil ug ang duha ka biktima dali usab nga gidala sa Mandaue City District Hospital.
Si PO3 Pasaylo miingon nga nagtuo sila nga ang grupo sa mga batan-on nga sakop sa gang maoy namusil sa maong lugar.
Sa nasayran, lain usab nga pagpamusil ang nahitabo sa barangay Alang-Alang sa mao gihapong dakbayan diin usa ka dalagita ang namatay ug miangol usab sa tulo pa ka mga batan-ong lalaki nga mga kauban niini dili pa dugay. – BANAT NEWS