CEBU, Philippines - Gumikan sa hulga sa mga terorista dinhi sa nasud ug ang giingong pagsulod sa mga tulisan dinhi sa Sugbo gikan sa Mindanao ang kapolisan sa probinsya padayong miawhag sa tagdumala sa mga rural bank nga magbutang gyud sila og guwardya.
Si Sr. Supt. Erson Digal, hepe sa kapulisan sa lalawigan mitug-an nga hangtod karon daghan pa gihapong mga rural bank nga wala gyud magbutang og guwardya bisan nabaniog na nga adunay mga tulisang gikan sa Mindanao ang ania dinhi karon sa Sugbo.
Si Digal miingon nga duna gyuy palisiya nga kinahanglang ang mga rural bank magdestino gyud og guwardya.
Matud ni Digal nga wala gyud siya makauyon sa dihang giingnan sa siya mga tagdumala sa ubang bangko nga sila maoy pahangyuon sa ilang main branch nga pabutangan og guwardya ang ilang bangko nga anaa sa probinsya.
“Kun dunay tulis sa bangko, pulis dayon maoy basolon nga wala dayon ka responde.”
Matud ni Digal nga matag buwan nga sila magtigom sa mga nagdumala og bangko dinhi, kanunay niyang pahinumdoman nga gikinahanglan gyud magbutang og guwardya aron simbako kun adunay tulis nga mahitabo at least adunay makabantay niining guwardya.
Apan daw sa gipalapos lamang sa pikas dunggan ang pahinumdom ni Digal sanglit ubay-ubay gihapon ang wala motuman niini. – BANAT NEWS