Delivery van nalimbuwad, 1 tipi

CEBU, Philippines - Patay ang usa ka promodiser nga lalaki dihang mibalitok ang delivery van nga iyang gisakyan human masungag sa jeep pasaheroan diha sa dalan E. O. Perez sa reclamation area sa barangay Subangdaku, dakbayan sa Mandaue alas-7 pasado ang takna sa buntag kagahapon.

Si PO2 Ruben Serdena miila sa namatay mao si Glenn Cabase Bringuez, taga Basak, Pardo, dakbayan sa Sugbo ug nagtrabaho sa Prince Warehouse Club sa dakbayan sa Sugbo.

Si Alex Labitad Gabato, taga dakbayan sa Toledo maoy nagmaneho sa delivery van nga giluwanan sa biktima nga sayo untang mibiyahe paingon sa Prince Warehouse Club sa dakbayan sa Danao. Dugang pa ni PO2 Serdena nga ang gikasungag nga jeepney sa delivery van gimaneho ni Paquito Pilapil Castellote, 36, taga Taytay sa dakbayan sa Bogo.

Si PO2 Serdena miingon nga kusog nga nagdagan ang pasaheroan paingon sa dakbayan sa Sugbo maong dihang nagbinanggaay sa delivery van nabalitok ang maong van nga nakaingon sa kadaot sa lawas sa namatay.

Si Gabato ug laing duha ka mga truck helpers nga tupad nga naglingkod sa front seat sa delivery van wala hinuon maunsa gawas lamang sa ginagmay’ng bun-og.

Apan si Brinquez maoy nagrabehan tungod kay mao kini ang toa sulod sa van ug giingong nabanda-banda hangtud nga naabli ang van ug nalagpot sa gawas. Si Bringuez dali untang gidala sa Mandaue City District Hospital apan gideklarar kini sa mga doktor nga dead on arrival.

Ang duha ka mga drayber sa nagkasungag nga sakyanan parehong gitanggong sa detention cell sa Presinto 2 sa Subangdaku Police Station samtang padayon ang imbestigasyon alang sa pagpasaka og kaso.  – BANAT NEWS