'Gi-torture' ang mga bata

CEBU, Philippines - Kagahapon pa hingpit napasaka ang kasong double murder Og kalapasan sa Republic Act 8294 kun illegal nga paghupot og armas batok sa duha ka mga suspetsado sa pagpatay sa duha ka mga bata sa Purok 4, barangay Cubacub, dakbayan sa Mandaue.

Ang duha nga gipasakaan sa maong mga kaso mao sila si Luzas Taoy ug Jason Laurente nga pulos lumad nga taga lungsod sa Carmen kinsa suspetsado sa pagpatay nila ni Elarry Villarin,12, ug Aljay Acuesta,13, nga molupyo sa maong lugar.

Si Insp. Ramil Morpos sa Investigative and Detective Management Bureau miingon nga wala na malakip sa pagpasaka ang kasong Comelec gun ban sanglit nahitabo ang krimen didto man sa sulod sa compound sa farm nga ilang gibantayan.

Matud pa ni Insp. Morpos nga base sa migawas nga resulta sa awtopsiya sa patay’ng lawas sa mga biktima nga gihimo ni Dr. Nestor Satur sa PNP Crime Laboratory -7 aduna gyuy timailhang gipamun-og sa wala pa patya ang mga bata. Si Satur dihang nahinabi sa Banat News miingon nga si Villarin adunay mga bun-og sa mga kamot nga gituohan niyang ‘gipukpok’ nga nakaingon sa paghubag niini.

Samtang gawas pa niini mao ang mga nakit-ang grabeng bun-og sa ilang mga mata nga gituohan gihapong inagian sa pagpamukbok. Adunay nakuhang tulo ka slug sa kalibre 22 gikan sa lawas ni Villarin samtang si Acuesta pulos gilapsan sa bala ang lawas.

“Naa man kitay nakitang mga indications nga gibun-og ang mga biktima, mostly sa ulo,” matud pang Satur apan giklaro niyang ang nakapatay sa mga bata mao ang mga samad pinusilan.

Dugang pa ni Satur nga sa paraffin test batok sa mga suspetsado migawas sa resulta nga positibo sila sa gun powder nitrates nga posibleng timailhan nga nakapabuto gyud sila og pusil.

Samtang si Mayor Jonas Cortes dihang nahinabi sa mga tigbalita ang mibutyag nga mohatag ang dakbayan og pinansiyal nga hinabang ngadto sa mga ginikanan sa duha ka mga bata. Dugang gitinguha ni Cortes nga tabang ngadto sa mga ginikanan sa biktima mao ang paghatag og abogado nga maoy moatiman sa kaso nga gipasaka batok sa mga suspetsado.

Kagahapon dungan nga gilubong ang mga bata diha sa Polpogan Public Cemetery diin gipatong ang duha ka lungon sa mga bata sa usa ka panteyon.

Miuban sa paghatud sa mga bata sa katapusan nilang pahuwayan mao ang ilang mga kabanay ug mga classmates ug magtutudlo nga pulos misinggit og hustisya.   – BANAT NEWS