ORMOC CITY, Philippines – Nunot sa paghinumdom sa ika-19 ka kasumaran sa baha nga miigo ning syudad niadtong Nobiyembre 5, 1991, diin kapin sa 8,000 ka mga tawo ang nangamatay, ang Ormoc nagpahigayon og usa ka panagtigom sa mga ‘rescue teams’ sa tibuok rehiyon 8.
Kapin sa 400 ka mga partisipante gikan sa mga nagkadaiyang sektor sa katilingban ug 22 ka mga grupo sa nagkalain-laing ahensya ang mitambong sa maong kalihukan nga gisugdan gikan pa kagahapon.
Ning adlawa (Nobiyembre 5) adunay pagahimuon nga lecture mahitungod sa Disaster Risk Reduction Management (DRRM) Act of 2010, Command System ug Climate Change Adaptation nga gituhuan nga makatabang og dako kun aduna may kalamidad nga moigo sa dapit.
Kini gihimo human sa kasaulugan sa usa ka Santos nga Misa alang sa mga biktima diha sa gihimong mass grave sa sam-ang.
Si Mayor Eric Codilla sa dihang gihinabi sa Banat News nagkanayon nga importante kaayo ang kanunay’ng pagpangandam tungod kay dili hibaw-an kun kanus-a mahitabo ang kalamidad.
Siya usab mitataw nga ang pagdawat sa syudad isip ‘host’ ning nagpadayon nga 2nd Regional Rescue Jamboree nahimong mabulokon tungod sa trahedya nga nahitabo.
“Matag usa ka team lain-lain ang field of expertise, kun kining mga butanga matipon pinaagi sa proper coordination sa tanang teams sa rehiyon 8, sayon ug epektibo na unya ang pagresponde kun ugaling may kalamidad man nga moigo. Kun sunog, ang batid ug kompleto sa kahimanan alang sa sunog mao ang ipadala, apan dili sabton nga dili na lang motabang ang uban,” matud niya.
Gimugna sa Office of the Civil Defense (OCD) sa Rehiyon 8 base sa United Nations nga konsepto sa panaghugpong sa mga rescue teams aron sa pagsulbad ug pagpangita og solusyon ug pagtubag sa kalamidad pinaagi sa maayo ug hiniusang koordinasyon.
Ang maong kalihukan gisuportahan usab sa German Technical Cooperation (GTZ). – BANAT NEWS