CEBU, Philippines - Sa ika-upat nga higayun, ang Provincial Employment Service Office (PESO) sa lalawigan sa Sugbo nakasakmit na usab sa Top Regional Performers Award (TRPA).
Gihatag kining maong pasidungog ngadto sa mga PESO sa tibuok rehiyon 7 nga nakamugna og mga mahinungdanong mga programa alang sa mga walay mga trabaho.
Ang paghatag sa maong pasidungog nga nadawat sa PESO sa lalawigan sa Sugbo gipahigayon didto sa lungsod sa Cordova niadtong nakalabay nga semana.
Si PESO consultant Dr. Mathea Baguia miingon nga isip awardee sa TRPA sa Central Visayas, ang iyang buhatan automatic nga manominar sa first class province category alang sa Best National PESO.
Matud pa ni Baguia nga ang criteria sa duha ka award gibase sa gidaghanon sa employment facilitation gikan sa local ug overseas job, employment guidance, counseling ug labor market information.
Lakip usab sa maong criteria mao ang special program nga hinimo gikan sa iyang opisina.
Bisan pa kun wala masakmit sa Cebu Provincial PESO ang kadaogan alang sa national category, si Baguia mapasigarbuhon gihapon nga nahilakip sa nominasyon.
Suma pa niya, gamay ra gyud kaayo ang mga nominado sa maong citation.
Matud pa usab niya nga ang maong pasidungog dili makab-ot sa PESO kun wala pa ang grabing suporta nga gihatag ni Gobernador Gwendolyn Garcia.
Ang mga programa sa miaging tuig maoy gibasihan sa mga award nga gipanghatag ngadto sa mga lalawigan nga malampuson sa ilang programa alang sa pagpasulod og trabaho sa mga walay trabaho. – BANAT NEWS