CEBU, Philippines - Naglaraw si Mayor Michael Rama nga mopalit ang kagamhanan sa siyudad og helicopter aron dali rang maka-responde sa bisan unsa nga mahitabo nga emerhensiya sama sa mga dagkong sunog.
Sumala sa report sa TV Patrol Central Visayas nga nabantayan sa mayor nga dako kaayo og ikatabang ang helicopter sa pagsuta sa sitwasyon kun adunay mahitabong sunog ug hingpit nga ma-monitor aron makahimo og dinaliang aksiyon ang mga awtoridad.
Nakombinser ang mayor sa pagpalit og helicopter human sa dakong sunog nga miigo sa barangay Duljo Fatima sa miaging adlaw diin 172 ka pamilya ang naapektohan .
Matud pa niya nga kinahanglan gyud nga may igong kahimanan aron dali ra ang pagresponde sa bisan unsa nga mga hitabo.
Samtang gipadayag ni kapitan Elmer Abella sa Duljo nga adunay pipila ka mga biktima ang wala moistar sa evacuation site gumikan kay gibantayan nila ang ilang mga butang.
Hinuon giangay ang pag-apod-apod sa mga relief goods ngadto sa mga biktima diin ang ilang distribution center didto ibutang sa barangay hall.
“Gituyo nato nga sa barangay hall ipanghatag ang mga relief goods aron hapsay ang dagan sa pag-apod-apod niini,” matud pa ni Abella.
Sa pagkakaron ang mga biktima anaa mopuyo sa gym ug sa barangay hall.
Kahinumduman nga ang siyudad mogahin og P4.9 ka milyon nga calamity fund alang sa mga naapektohan sa sunog. – BANAT NEWS