Lalaking gisuyaan gidunggab angol

CEBU, Philippines - Nabuslot ang tuong dughan sa usa ka ulitawo human kini dunggaba sa wala hiilhing kriminal didto sa   Plaza Rizal, barangay Poblacion, dakbayan sa Lapulapu sa miaging gabii.

Ang biktima mao si Reymart Opona, 19 anyos, ulitawo nga lumad nga taga Villava, lalawigan sa Leyte ug kasamtangang nagpuyo sa barangay babag, dakbayan sa Mandaue.

Si SPO4 Rolito Jumao-as sa homicide section sa kapolisan sa maong dakbayan nga nahinabi sa Banat News miingon nga kuyog sa biktima ang iyang mga higala nga mga babaye nga nanuroy sa plaza.

Nakigkukabildo ang biktima sa iyang mga kakuyog sa sulod sa plaza dihang kalit miduol ang usa ka wala hiilhing kriminal ug gidiretso og duslak ang dughan sa biktima.

Wala siya makalikay gumikan sa kakalit ug wala usab sila makabantay sa kriminal.

Human sa maong pagpanunggab misirit dayon pahilayo sa maong lugar ang kriminal samtang gihatod usab dayon ang biktima ngadto sa Lapulapu City Hospital apan gibalhin kini ngadto sa Vicente Sotto Memorial Medical Center (VSMMC) sa dakbayan sa Sugbo.

Padayon pang gipangita sa kapolisan ang kriminal kinsa gituohan nilang nasuya ra kini sa biktima.   – BANAT NEWS