Furniture company gitulis

CEBU, Philippines - Nahanaw ang dakong kantidad nga salaping dolyares sa usa ka export company sa Purok Limonsito sa barangay Umapad, dakbayan sa Mandaue human gitulis sa duha ka armadong lalaking nagtaptap og panyo sa ilang mga nawong alas-10 pasado ang takna sa buntag kagahapon atol sa pagsaulog sa Todos Los Santos.

Si Insp. Wilson Abot, hepe sa kapolisan sa Presinto 5 sa Mandaue City Police Office (MCPO) miingon nga nakasulod ang tulisan sa sulod sa compound sa I-Source Inc human gipasulod sa piniyalan nga si Guia Oblima, 50.

Si Oblima nga taga barangay Banilad sa dakbayan sa Sugbo, sumala pang Abot maoy miabli sa pultahan human gipislit sa mga tulisan ang doorbell sa ilang gate. Matud pa niini nga nakalitan si Oblima dihang gitionan og wala matinong kalibre sa armas ug gibunlot siya pasulod sa buhatan.

Matud pa niini nga gipugos siya sa mga tulisan nga ablihan ang vault nga maoy gisudlan sa salaping mokabat sa $5,000 dolyares kon gibana-banang kapin sa P200 mil sa kwarta sa Pilipinas.

Gikatahong napugos siya pag-abli sa vault gumikan sa pagsikad kaniya ug paghulga sa mga tulisan. Giingong gihiktan si Oblima sa mga tulisan atol na sa ilang pag-ikyas luwan sa usa ka motorsiklo.

Sa imbestigasyon nga gihimo nila ni Abot ilang nasuta nga walay security guard ang maong establisamento nianang mga orasa gawas lang sa iro nga Doberman nga maoy nagsilbing bantay diha sa maong dapit.

Apan niadtong tungura giingong gidala sa boy ang maong iro diha sa luyong bahin hinungdan nga nagduda karon ang kapolisan nganong naatol nga ang maong iro didto sa luyo dihang misulod ang mga tulisan.

Tungod niini wala isalikway sa kapolisan ang posibilidad nga inside job ang nahitabo. Dugang nakapaduda sa kapolisan mao nga ang mga drayber sa traysikad nga mag-estambayan diha sa maong dapit wala usab makamatikod nga adunay komosyon nianang mga taknaa.

Mao na kini ang ikaupat nga establisamento nga gitulis sa dakbayan sa Mandaue sugod niadtong milabay’ng buwan. Una niin mao ang LBC sa dalan A, S. Fortuna sa barangay Banilad, gisundan kini sa pagtulis sa Banco Maximo sa dalan A. del Rosario sa barangay Guizo.

Ug ang pagtulis niadtong milabay’ng adlaw sa mga armadong lalaki sa usa ka hardware sa dalan A.S. Fortuna sa barangay Banilad nga pabilin pa gihapong blangko ang kapolisan. (BANATNEWS)