Mipatay kang Yaon gidepensahan

CEBU, Philippines - Gipanalipdan sa hepe sa Cebu City Police Office (CCPO) ang joint team sa CIB, PIB, Homicide ug Talamban Police station nga nakapusil patay sa miaging Sabado kang Marianito Yaon alyas Manit, kanhi barangay kapitan sa barangay Antipolo, sa lungsod sa Medellin, Cebu. Si Sr. Supt. Melvin Ramon Buenafe sa pakighinabi sa mga tigbalita kagahapon nagkanayon nga usa ka lihitimo nga operasyon ang gihimo sa kapolisan dihang misukol ug unang namusil si Yaon sa mga otoridad.

Ang grupo nga gipamusil ni Yaon gisakpan nila ni Supt. Rodulfo Albotra hepe sa PIB, Chief Insp. Romeo Santander, hepe sa CIB ug mga sakop sa Talamban Police station ug mga sakop sa Homicide section sa CCPO.

Sila maoy misilbi   sa warrant of arrest nga giisyu ni RTC Branch 61 Judge Antonio Marigomen ngadto kang Yaon gumikan sa kalapasan sa illegal possession of firearm ug R.A 9165 didto sa sitio Dita sa barangay Pulangbato niadtong Domingo sa buntag.

Matud ni Buenafe nga wake up call kadto sa mga polis sa dihang giunhan sila pagpusil ni Yaon mao nga mibawos sila pagpusil dihang delikado ang kinabuhi niadtong higayona.

Ilang ipaubos sa parrafin test si Yaon ug ipa ballistic exam ang iyang armas aron pagtino kun nakapabuto ba gyud ang kapitan sa gidala niining .45 nga kalibre nga pistola aron mawagtang ang pagduda sa publiko.

Matud niya nga awtomatikong adunay pagahimuon silang imbestigasyon bisan pa kun kadto usa ka lihitimong operasyon sanglit mao kini ang standard operating procedure sa kapolisan ilabi na kung adunay makalas o maangol atol sa operasyon.

Si Chief Insp. Santander nga nahinabi usab sa mga tigbalita kagahapon nagkanayon nga andam siyang mopaubos sa imbestisgasyon kun ugaling moreklamo ang pamilya ug kabanay sa kapitan. (BANATNEWS)