CEBU, Philippines - Usa ka amahan namatay dihang misuway kini og luwas sa iyang duha ka anak nga miunlod na sa ilawom sa dagat didto sa barangay Poblacion lungsod sa Alegria sa miaging hapon.
Ang namatay nailhan nga si Edwin Collades Getauban, 43, lumad nga nagpuyo sa barangay Lahug, dakbayan sa Sugbo.
Base sa inisyal nga imbestigasyon sa kapolisan sa lungsod sa Alegria nasayran nga ang biktima uban sa iyang pamilya mibakasyon sa ilang kaliwat sa maong lungsod ug nakadesider kini nga mangaligo sa usa ka beach resort.
Samtang nalingaw og pangaligo ang duha ka anak nga nagpangidaron ang usa’g-usa og 10 ug 11-anyos, nabantayan sa biktima nga naglisod na kini og langoy nga paingon na sa pagkalumos hinungdan nga gidali-dali kini niya sa pagluwas.
Nasalbar gyud niya ang iyang mga anak, apan gumikan sa iyang kaluya, ang biktima na usab ang nakabsan sa gininhawa hangtod nga gikuyapan kini.
Gihatod dayon sa tagtungod ngadto sa Reinhard Wertgen Memorial Hospital sa maong lungsod apan gideklarar kini nga dead on arrival. Sa pakighinabi sa Banat News ni Inspector Daniel Comision, ang hepe sa kapolisan sa maong lungsod, siya mibutyag nga niadtong tungora dagko ang balod nga maoy gidudahang hinungdan nga diriyot malumos ang mga anak sa biktima. (BANATNEWS)