CEBU, Philippines - Ang pagpaninda og bibingka sa may eskina sa sam-ang publiko sa barangay Poblacion dakbayan sa Talisay maoy usa sa panginabuhian sa inahan sa 22-anyos nga out of school.
Si Terence Alien Villaver, 22, kamagwangan sa upat ka anak sa magtiayong Estrellita, 44, ug Teresito Villaver, 53, nagpuyo diha sa barangay Dumlog, kinsa 3rd year irregular unta sa kursong Bachelor of Science in Information Technology sa University of Cebu apan naundang sa iyang pagtuon gumikan sa kaapiki nila sa panginabuhi.
Si Terence naabtan sa Banat News nga nag-apong sa ilang tindang bibingka kay mitabang siya sa iyang inahan sa pakigbugno sa panginabuhi matag adlaw.
Isip kamagwangang anak samtang wala pa siya makakita og trabaho miabag una siya sa iyang inahan ug iyaan nga si Leoniza Lingaw-lingaw sa pagpaninda og bibingka.
Matud ni Terence nga niadtong tuig 1996 ang iyang apohan nga si Blizerda Alfanta maoy unang naninda og bibingka diha sa maong eskina paingon sa sam-ang sa barangay Poblacion diin ang balay niini diha usab nahimutang.
Apan sa pagka-1998, mitaliwan ang iyang apohan ug ang iyang inahan ug iyaan na karon maoy mipuli sa pagpaninda.
Kaniadto nabantayan ni Terence nga kusog ang halin sa ilang bibingka apan karon mihinay na kini tungod kay daghan na man ang mikompetensiya.
Matud ni Terence maninda sila matag Sabado ug Domingo diin ang upat ka kilong bugas humay moabot usab og 100 ka haon nga bibingka.
Kaniadto ibaligya nila sa tag P5 ang matag haon, apan karon gihimo na nilang tag P8 ang buok tungod kay misaka man usab ang presyo sa bugas, asukar, lubi ug uban pang sagol.
Sa matag Kalag-kalag, muabot og tag duha ka sakong bugas ang ilang lutoong bibingka, sumala ni Terence, ug kuwangon pa kini, apan karon tag kapin nalang sa usa ka sako kay mihinay na ang pinalitay sa ilang bibingka.
Tungod kay walay atop ang ilang lutoanan, apiktado kaayo sila kun mag-uwan kay momenus man ang halin niini.
Usa sa hinungdan niini mao ang pagdaghan usab sa mangluto og bibingka nga mitupad kanila nga maoy makita karon diha sa maong eskina paingon sa ganghaan sa menteryohan sa Poblacion, Talisay. (BANATNEWS)