CEBU, Philippines - Namatay ang usa ka lalaki human makuryentihi samtang nag-ayo siya sa linya sa suga sa iyang balay didto sa barangay Pooc lungsod sa Sta. Fe sa miaging gabii.
Ang biktima nailhan nga si Arturo Escaran, 49, minyo , usa ka mananagat , nga taga Santa Fe.
Base sa inisyal nga imbestigasyon sa kapolisan sa lungsod sa Sta. Fe nasayran nga gisusi sa biktima ang naputol nga linya sa kuryente sa ilang balay nga gikonektar ngadto sa usa ka cottage nga nahimutang sa Sugar Beach Resort.
Busa iya kining gisuwayan og sumbay bisan dili siya electrician, dihang wala damha nga nahikapan niya ang laing buhi nga linya sa kuryente tupad sa natangtang nga linya.
Gumikan sa kakusog sa kuryente, mipilit ug mikurog ang biktima ug dihang mihutlay na kini, gihatod dayon sa mga tagtungod ngadto sa Bantayan District Hospital apan human sa pipila ka minutos nakabsan gayud kini sa iyang kinabuhi.
Sa pakighinabi sa Banat News ni PO2 Erick Ilustrisimo sa Santa Fe Police Station, kini mibutyag nga bisan dili electrician, gisuwayan lang gyud pag-ayo sa biktima ang linya sa kuryente aron sila makasuga niadtong higayona.
Nasuta sa kapolisan nga walay foul play ang maong kamatayon sa biktima. (BANATNEWS)