Kapin 500 ka polis idestino sa sam-ang

CEBU, Philippines -  Kapin sa tunga sa libo ang i-deploy nga mga polis wala pay labot sa mga force multipliers sama sa mga barangay tanod, mga sakop sa Barangay Intelligence Networks ug ingon man pwersa gikan sa Central Command atol sa pag-obserbar sa Adlaw sa mga Santos ug sa mga minatay karon ug ugmang adlawa dinhi sa dakbayan.

Si Sr. Supt. Melvin Ramon Buenafe sa pakighinabi sa Banat News nagkanayon nga adunay 450 ka mga unipormadong polis nga ipakatap sa mga sam-ang sa dakbayan.

Ang dakbayan sa Sugbu adunay onse ka mga dagkong pampubliko ug pribadong mga sam-ang gikan nga nahimutang sa mga barangay sa Carreta, Lorega-San Miguel, Calamba, Pardo ug Talamban.

Nanawagan usab si Buenafe sa katawhan nga moadto sa mga sam-ang nga dili magdala og mga mahalong mga butang ug mga alahas ilabi na nga magdasok ang mga tawo diha sa ilang mga adtoang sam-ang.

Subling gipahimangnoan ni Buenafe ang mga Sugbuanon nga dili maghurot og biya sa ilang mga panimalay aron moduaw sa ilang mga minahal sa kinabuhi ug sigurohong adunay magbantay sa ilang mga balay.

“Tanan natong kapulisan involved sa pagbantay sa atong mga sementeryo, mga terminals, mga malls and other commercial establishments,” matud pang Buenafe.

Gawas sa i-deploy nga mga polis gimando usab ni Buenafe ang pagpatrolya sa mga kabalayan batok sa mga kawatan.

Ang kabomberuhan usab mipahimangno nang daan sa publiko nga dili biyaan ang ilang mga altar nga adunay gidagkutang kandila nga ilang gihalad ngadto sa ilang mga mahal sa kinabuhi subay sa naandang tradisyon.

Kini gumikan sa peligro sa mahitabong sunog kun maupos ang kandila ug madukot ang ilang gibutangan niini. (BANATNEWS)