CEBU, Philippines - Patay diha-diha ang usa ka lalaki human pusila sa iyang pag-umangkon niadtong milabay’ng hapon diha sa barangay Maharuhay lungsod sa Medellin. Ang biktima nailhan nga si Sernie Montaño, 43, samtang ang suspetsado nailhan usab nga si Harry Hesalan, 22, human ang duha nag-away tungod lang sa inom.
Base sa imbestigasyon sa kapolisan sa lungsod sa Medellin, nasayran ang biktima ug ang suspetsado nag-inom ug giagda si Evet Suarez nga nahiagi sa maong dapit aron paimnon apan mibalibad kini hinungdan sa kasuko sa biktima.
Gisuwayan unta sa suspetsado nga pakalmahon ang uyoan apan giingong nasuko kini maong sila na hinuoy nag-away. Giingong gipabuthan sa biktima og pusil ang suspek apan wala makaigo hinungdan nga mibunot usab sa iyang armas ang suspek ug gipusil ang uyoan sa dughan ug tiyan nga miresulta sa hinanali niining kamatayon, ang suspek gipangita pa gihapon. (BANATNEWS)