ABC president sa Lapulapu mao gihapon?

CEBU, Philippines - Dako ang kahigayonan nga magpabilin gihapon isip Association of Barangay Council (ABC) federation president si barangay Kapitan Leo Mercado sa Pajo sanglit ang 30 ka barangay kapitan nga midaug sa miaging Oktobre 25 nga piniliay kaalyado man sa administrasyon ni Mayor Paz Radaza.

Kini gilangkoban sa 29 ka barangay nga nahimutang sa mainland ug 11 usab ka barangay ang nahimutang sa isla sa Olango sa maong dakbayan .

Si Mercado nga nasublian sa katungadanan isip barangay kapitan sa Pajo sa dakbayan sa Lapulapu nahimong federation president sa ABC sa maong dakbayan sukad pa sa kanhi administrasyon ni kanhi Mayor Arturo Radaza nga kongresista na karon sa Lone District sa maong dakbayan.

Naglingkod kini nga ex-officio member sa konseho sa dakbayan nga maoy nagsilbing nagdala sa tingog sa mga barangay kapitan alang sa pagtuki sa mga balaodnon sa dili pa kini hingpit nga kaaprobahan.

Ang pagpadayon ni Kapitan Mercado sa paghupot sa katungdanan isip ABC federation president mahimong walay kaatbang sanglit sa 30 ka mga barangay kapitan nga napili sa miaging piniliay ang lima lamang kanila ang bag-o, ug pipila kanila ang gilauman usab nga mahimong kaalyado sa administrasyon.

Nag-una sa midaug nga barangay kapitan nga gikan sa oposisyon mao si kanhi barangay Konsehal Isabelito Darnayla nga kandidato sa miaging Mayo 10 nga piniliay sa pagka mayor ug kaatbang ni Mayor Radaza.

Nahimo na usab nga barangay kapitan si Darnayla sa Basak sa wala pa kini motakli sa pagka barangay konsehal dihang napupos na usab ang iyang termino ug mibalik sa pagpapili sa maong katungdanan niadtong Oktobre 25 nga piniliay ug iyang naangkon ang kadaugan batok kang barangay Kapitan Lolit Berdin nga kaalyado ni Radaza.

Ang mga bag-ong barangay kapitan nga midaug sa miaging piniliay mao sila si Remegio Oyao sa barangay Agus, Nestor Paypa sa barangay Canjulao, Joselito Tibon sa Suba Bas-bas ug Nelson Tibon sa barangay Sabang sa isla sa Olango. (BANATNEWS)