CEBU, Philippines - Padayong gihingusgan sa kapolisan ang kampanya batok sa tanang matang sa illegal nga sugal subay sa kamandoan sa ilang ulohang buhatan sa Camp Crame.
Si Sr. Supt. Melvin Ramon Buenafe, hepe sa Cebu City Police Office (CCPO) mitug-an nga daghan na silang nadakpan nga nagpadagan og Mole-mole ug Video Karera machine.
Ang CCPO dili pa dugay nakasakmit og 29 ka mole-mole ug video karera machine atol sa ilang operasyon gikan sa lain-laing barangay dinhi sa dakbayan.
Matud ni Buenafe iyang dogmokon ang mga mole-mole ug video karera machine karung sunod semana ug mangimbitar siya og mga opisyal sa dakbayan aron maoy padugmokon sa maong mga illegal nga sugal.
Si Buenafe mitug-an nga lain-laing reklamo ang iyang nadawat, diin usa na niini ang reklamo nga adunay nagpadagan og illegal nga sugal hinungdan nga iyaha dayong mandoan ang iyang mga sakop nga mohimog operasyon.
Matud pa niya nga padayon ang ilang hugot nga kampanya batok sa illegal nga sugal dinhi sa dakbayan subay usab sa kamanduan gikan sa ulohan nilang buhatan sa pagpahinlo sa kabaranggayan gikan sa illegal nga sugal .
Si Buenafe miingon nga dili hinuon kaayo problema ang illegal nga sugal dinhi sa dakbayan sanglit subsob ang ilang operasyon pagpanakop sa nagpadagan niini.
Iyang giawhag ang katawhan sa pagreport gilayon ngadto sa kapolisan kun aduna silay makit-an nga illegal nga sugal sa ilang lugar aron ila dayon kining operasyonan.
Ang mga sinsilyo nga anaa sa 29 ka mole-mole ug video karera machine, matud ni Buenafe iyang i-turn over sa ilang chaplain sa ilang kapilya diha sa CCPO ug depende na kini kun unsay dapatan sa maong salapi nga gikan sa illegal nga sugal. (BANATNEWS)