2 bata gipamatay

CEBU, Philippines - Napalgan sa miaging gabii sa baga nga kasagbotan ang patay’ng lawas sa duha ka mga bata diha sa Purok 4 sa barangay Cubacub, dakbayan sa Mandaue nga giingong gipusil sa caretaker sa usa ka farm sa manokan diha sa maong dapit.

Si SPO3 Kerwin Bejer sa Investigation Detection and Management Bureau (IDMB) miila sa duha ka biktima nga sila si Aljay Acuesta, 13, ug Elarry Villarin, 12, pulos molupyo sa maong dapit,

Samtang arestado usab ang duha ka mga gipasanginlang mipusil sa duha nga mao sila si Lucas Taoy, 35, taga Lamac, lungsod sa Carmen ug Jesson Laurente, 19, taga Sac-an sa mao gihapong lungsod.

Si Sr. Supt. Noel Gillamac, direktor sa Mandaue City Police Office (MCPO) miingon nga kasong murder ug paglapas sa Comelec gun ban ang ilang ipasaka batok sa duha.

Si Gillamac nagkanayon nga base sa imbestigasyon giplano sa mga suspetsado ang pagpatay sa mga biktima. Sumala pa ni Gillamac namahayag ang mga suspek nga ilang giatangan ang mga biktima tungod kay ang duha maoy ilang gidudahang maoy responsable sa mga nahitabong pagpangawat sa maong dapit.

Ang mga suspek nakuhaan usab og duha ka .22 caliber pistol ug laing .22 caliber nga revolver nga dili mga paltik nga dunay mga buhing bala ug buot pa kini karong susihon sa mga imbestigador sa records sa Firearms and Explosives Security Agency, Guards Supervisory Section kun kang kinsa kini naka-lisensya.

Matud pa ni SPO3 Bejer nga ang duha ka suspetsado nga ilang nadakpan nga didto lamang usab sa sulod sa compound sa maong farm kagahapon sa kaadlawon.

Ang inahan ni Villarin nga si Emma Soco ug si Virgilio Soco nga amahan ni Acuesta maoy nakakaplag sa duha diha sa maong kasagbutan human sila makadawat og impormasyong uwahing nakit-an ang duha nga mitungas sa maong dapit nga nagbitbit og martilyo niadtong Huwebes sa hapon.

Ang duha ka mga ginikanan midangop na sa kapolisan ug sa barangay aron ipahibalong na-missing ang maong mga bata.

Ang mga bata diha makit-i tupad sa barbed wire nga kural lakip na ang galvanized iron sheets ug ang martilyo pasado alas-11 na sa gabii niadtong Biyernes.

Si Villarin napusilan katulo ka higayon diha sa tiyan samtang si Acuesta naigo duha ka higayon sa dughan ug sa tuong dughan.

Sa nahipos nga kasayuran sa mga imbestigador sa IDMB ang duha ka mga biktima ug mga silingang mga bata kanunay nga moadto sa maong dapit aron mangita og kaka.

Sa pagsukit-sukit ni Bejer sa mga suspek giingong mibutyag silang daghan nang mga nangawagtang nga kabtangan diha sa manukan hinungdan nga ang mga bata ilang giatangan apan dihang ilang nasakpan miaksiyon sila og sukol ginamit ang martilyo hinungdan nga ilaha kining napusilan.

Matud pa ni Bejer nga sa duha ka mga armas nga ilang nasakmit ang armas lamang ni Taoy maoy giingong gigamit apan bisan pa man niini ipailawom pa sa ballistics test ang maong mga armas.

Si Emma nga inahan sa biktima nga si Acuesta miingon nga niadto pang Oktobre 28 nga wala mahiuli ang duha ka mga bata nga maoy hinungdan nga ilang gipangita. (BANATNEWS)