Pasahero gitulis sa drayber sa taxi

CEBU, Philippines - Usa ka babaye nga trabahante sa call center giunay og tulis   sa drayber sa taxi nga iyang gisakyan didto sa sitio Sindolan, barangay Mabolo ning dakbayan sa Sugbo sa miaging gabii. Ang biktima mao si Dorothy Carin Quimada, 31, dalaga, nga taga   M.J. Cuenco sa barangay Mabolo, samtang wala niya hiilhi ang drayber sa taxi ug bisan ang plate number ug body number niini nga iyang gisakyan.

Si SPO2 Elmer Tanjay sa Mabolo nagkanayon nga misakay ang biktima didto sa M.J Cuenco ug nagpahatod ngadto sa I.T. Park diin nahimutang ang iyang trabahoan nga call center. Mitug-an ang biktima ngadto sa kapolisan nga nakatagpilaw siya sulod sa taxi, apan iyang namatikdan nga mihunong ang drayber sa hilit nga dapit dayong lipot sa luyo sa taxi nga nagbitbit na og screw driver.

Sa iyang kahadlok iyang gipatiran ang pultahan ug giabli dayon niya ang pikas pultahan sa taxi dayong dagan pahilayo sa maong lugar ug mideretso sa pagsumbong ngadto sa kapolisan.

Matud sa mga polis nga malagmit pahimuslan tingale unta sa drayber ang biktima kun wala pa kini makabantay.

Apan ang shoulder bag nga gisudlan sa iyang cellphone ug usa ka i-pod ug uban pang importanteng mga butang nahibilin sulod sa taxi.

Padayong gipanid-an sa kapolisan ang mga drayber nga manulis og pasahero. (BANATNEWS)