CEBU, Philippines - Gipasakaan og kaso sa kapolisan ang usa ka tawo nga nadakpan sa pagpangawat og mahalon nga mga cellphone sa barangay Looc, dakbayan sa Mandaue sa miaging kaadlawon.
Ang nag-atubang karon og kaso sa korte mao si Alin Gabuya, 25, nga taga dalan P. Burgos sa barangay Alang-Alang sa maong dakbayan.
Si Inspector Ramil Morpos, hepe sa Investigation and Detection Management Bureau (IDMB) miingon nga si Gabuya ilang nadakpan human kini ireklamo sa biktima nga si Arien Estrada, 36, nga taga barangay Looc sa maong dakbayan.
Matud pa ni Inspector Morpos nga gikakuyog sa suspetsado nga nag-inom sa ilang balay ang iyang ig-agaw ug wala lamang damha nga ang duha ka mga cellphone sa biktima nga nagkantidad og P30,000 ang matag usa, gisakiyo sa suspetsado.
Dugang pa ni Morpos nga dali nga nakapangayo’g panabang sa ilang buhatan ang biktima ug sa follow up nilang gihimo, ilang nasigpatan ang suspetsado nga naglakaw sa daplin sa dalan nga dala na ang maong mga butang nga maoy hinungdan nga ila kining gidakop ug gibalhog sa bilanggoan. (BANATNEWS)