Bihag himoong ABC president?

CEBU, Philippines - Hayan nga kahatagan na og katumanan ang pagtudlo kang Kapitan Mario Bihag sa barangay Tingob nga maoy mahimong Association of Barangay Council (ABC) federation president nga mohulip kang Kapitan Jovita Tuela Joy Ouano sa barangay Opao nga matapos na ang termino karong Nobyimbre 30 niining tuiga.

Kini ang nasayran sa Banat News kang Bise Mayor Glenn Bercede kinsa miingon nga ang pagtudlo og bag-o nga ABC federation president mag-agad kini sa pag-uyon sa mga barangay kapitan nga ilang gituohan nga maoy makadala sa ilang tingog sa hawanan sa konseho.

Si Bise Mayor Bercede miingon nga daghan hinuon sa mga midaug nga barangay kapitan nga ilang kaalyado sa administrasyon nga haum usab kaayo nga mohupot sa maong katungdanan.

Naglakip kanila mao sila si barangay Kapitan Carmilino del Mar Jr., sa Ibabao Estancia, Kapitan Damaso Tumulak sa barangay Labogon, Kapitan Vicente Dayanan sa barangay Basak, Kapitan Raul “Pokang” Cabahug sa barangay Looc, Kapitan Ernie Manatad sa barangay Subangdaku ug uban pa. Sa nasayran nga si Bise Mayor Bercede nahimong higpit nga kaatbang ni Kapitan Ouano sa paghupot sa katungdanan isip ABC federation president nga miresulta pa sa pagpadangat og reklamo sa korte nga maoy nakaingon sa kalangan sa pag-asumer niini.

Nakaangkon na lamang og kahigayonan si Ouano sa pag-asumer sa katungdanan isip ABC federation president human modaog si Bercede sa pagka-bise mayor sa Mandaue sa piniliay niadtong Mayo 10, 2010. (BANATNEWS)