Mga ATM bukas sa Kalag-kalag

CEBU, Philippines - Gipasalig sa Cebu Bankers Association nga duna silay pundong giandam sa ilang mga kliyente nunot niining taas nga bakasyon nga magsugod karong adlawa tungod sa kasaulogan sa Kalag-kalag.

Si Danilo Kinseng, vice president sa Bank of the Philippine Islands (BPI) nagkanayon nga magpadayon gihapon ang ilang serbisyo ngadto sa ilang kliyente niining taas nga bakasyon sanglit duna silay daghang ATM machine dinhi sa dakbayan ug Metro Cebu.

Gani iyang gitug-an nga aduna silay kapin sa 80 ka ATM machine dinhi sa dakbayan ug sa Metro Cebu.

Gawas niini miingon usab siya nga aduna usab silay cash acceptance machine, diin kadtong ilang mga kliyente nga buot modeposit sa ilang kuwarta ug ang mga kliyente nga makasugat og problema sa ilang pag -withdraw og kuwarta sa ATM atol sa mga piyesta opisyal adunay naka-standby nga personnel nga maoy modawat sa ilang reklamo.

Aduna usab silay mga hotline sulod sa 24 oras nga motubag sa mga reklamo sa ilang kliyente.

Matud niya ila na karong gipangandaman kun adunay taas nga holiday sanglit nakasugat na sila og problema kaniadto.

Si Kinseng nga gikuhaan og reaksyon kabahin sa balaodnon ni kanhi mayor ug karon kongresista sa south district Tomas Osmeña kalabot sa mga holiday sa Decembre, nagkanayon nga wala pa siyay nadawat nga notisya gikan sa ilang buhatan sa kaulohan kabahin niini.

Nagtuo hinuon siya nga adunay baroganan niini ang Bangko Central ng Pilipinas kun maaprobahan gyud sa hingpit ug mapatuman ang balaodnon sa kongresista.

Si Osmeña miduso niini ngadto sa Ubos Balay Balaoranan nga ideklarar nga non working holiday ang Disyembre 25 ngadto na sa Enero 2, 2011.

Gani aduna nay 52 ka mga kongresista ang mipabor niining maong balaodnon.

Tuyo ni Osmeña nga inay moadto sa mga dagkong department store ang mga tawo kun adunay kuwarta panahon sa pasko, mamauli kini sa ilang tagsa-tagsa ka probinsya ug sa ingon makadaginot sila sa kuwarta kay dili naman moadto sa mga dagkong tindahan.

Apan iyang gipasalig nga kun maaprobahan ang maong balaodnon sa kongresista ilaha gyud kining pangandaman og maayo.

Sa iyang bahin si Sr. Supt. Erson Digal, hepe sa kapolisan sa probinsya atol sa pakighinabi sa mga tigbalita miingon nga iya nang gimanduan ang tanan niyang sakop nga dili lang mo-focus sa mga sam-ang unya sa Kalag-Kalag kundili lakip sa bantayan nila mao kadtong mga bangko nga anaa sa ilang tagsa-tagsa ka hurisdiskyon.

Kini aron malinawon ug walay dugoong panghitabo atol unya sa kasaulogan sa kalag-kalag.

Samtang ang director sa Cebu City Police Office (CCPO) nga si Sr. Supt. Melvin Ramon Buenafe iya nang gimando sa tanan niyang sakop nga rovingan kadtong mga convenience store, pawnshop ug mga bangko ug uban pang financial institution ilabina kadtong nahimutang sa isolated areas aron masigurong dili makapahimulos ang mga badlongon sa katilingban. (BANATNEWS)