Kalag-kalag PNP alerto

CEBU, Philippines - Gisugdan na kagahapon sa buntag ang pagpakatap og dugang polis aron mobantay sa nagkadaiyang dapit sa lalawigan ug sa dakbayan sa Sugbu tungod sa nagsingabot nga paghandum sa adlaw sa mga Santos ug minatay. Si Sr. Supt. Erson Digal sa provincial police office mibutyag nga adunay tulo ka team sa Provincial Public Safety Battalion (kanhi Provincial Mobile Group) ang gipakatap sa Cebu South Bus Terminal ug North Bus Terminal. Si Digal nagkanayon iyang gituyo nga sayohon ang deployment sa duha ka terminals sanglit kagahapon sa hapon nagsugod na sa pagpamauli ang mga tawo sa probinsya.

Si Digal mitataw nga hangtud sa petsa 2, liwas sa kalag-kalag anha pa niya i-pullout ang maong mga polis ini og hingpit nang momenus ang bul-og sa mga tawong mamalik na dinhi sa dakbayan gikan sa probinsya.

Matud usab ni Digal aduna nay K-9 dogs sa duha ka terminals aron walay makalusot nga illegal nga kargamento sa mga pasahero inabagan sa Philippine Drug Enforcement Agency (PDEA)-7. Lakip sa pabantayan ang mga pantalan ug uban pang exit points nga paingon ngadto sa laing probinsya gikan sa mga lungsod.

Sa iyang bahin si Sr. Supt. Melvin Ramon Buenafe, hepe sa Cebu City Police Office (CCPO) miingon nga ang 22 ka sam-ang nga naglakip sa mga dagko nga sam-ang ang ilahang bantayan.

Giawhag ni Buenafe ang katawhan nga dili maghurot pag-adto sa sam-ang kay basin mopahimulos ang mga kawatan atol sa maong adlaw. Samtang sa SBT dugang 24 ka blue guards ang gidugang sumala pa ni Carmen Quijano ang tagdumala sa maong terminal subay usab sa kamandoan ni Gob. Gwendolyn Garcia.

Gipahibalo sa mga opisyal sa SBT nga mas sayo karon ang pagbiya sa first trip padulong sa habagatang Sugbu nga mobiya alas 2:30 sa kaadlawon ug ang last trip alas-9 sa gabii. Kun daghan pa gihapon ang pasahero posibleng himuon kini 24-oras.

Samtang gitaod na usab ang mga close circuit television aron pag-monitor sa kahapsay ug kalinaw sa mga terminal.

Ang tigpamaba sa Mactan Cebu International Airport Authority nga si Amid Cuizon mipasidaan sa mga mosakay og abyon pauli sa mga probinsya sa pagsayo og adto sa tugpahanan aron dili malangay sa subsob nga inspeksyon. Sa laing bahin, ang Philippine Coast Guard hugot nga mipatuman sa ‘no ticket-no boarding’ policy sa pantalan. (BANATNEWS)