CEBU, Philippines - Si Justice Secretary Leila De Lima namahayag kagahapon nga na-clear na ang pangalan sa Sugbuanong estudyante sa abogasya sa University of San Jose Recoletos nga si Jed Carlos Lazaga sa kalambigitan niini sa paglabay og granada sa gawas nga bahin sa De La Salle University sa Taft Avenue, Manila atol sa paghuman sa Bar Examination niadtong nakalabay nga bulan.
Matud pa ni Delima atol sa pagbisita niini kagahapon diha sa Kapitolyo nga ang pagkalingkawas ni Lazaga sa kaso gibase sa pagtahan sa miyembro sa Apha Phi Omega (APO) fraternity nga si Anthony Leal Nepumoceno nga mao karoy gitumbok sa National Bureau of Investigation nga maoy responsable sa maong krimen.
Si Bise Presidente Jejomar Binay kinsa sakop sa APO ug maoy giduol ni Nepomuceno namahayag nga inosente ang naulahi.
Apan si Delima kagahapon nagkanayon nga lig-on ang ilang ebidensiya batok kang Nepumoceno tungod sa ubay-ubay nga mga testigos nga boluntaryong miadto sa ilang buhatan ug mitabang sa ilang imbestigasyon.
“Since natukoy na nang NBI itong suspek na ito, he (Lazaga) is technically off the hook,” matud pang De Lima sa report kagahapon sa TV Patrol Central Visayas.
Sigon pa niini nga si Lazaga wala tumboka sa mga testigos nga may kalambigitan sa maong krimen ug posibleng nabiktima lamang kini sa away sa mga fraternities. Si Lazaga sakop sa Alpha Kappa Rho fraternity.
Gikalipay usab sa Dean sa College of Law sa University of San Jose Recoletos (USJR) ang paggawas sa suspetsadong si Nepomuceno.
Matud pa ni USJR College of Law dean Jonathan Capanas sa interbyu sa DyRF nga nalimpyuhan gyud ang pangalan sa ilang estudyante ug nalimpyuhan usab ang pangalan sa eskuylahan nga makadiyot nabaniog nga eskuylahan sa mga ‘bombers’ tungod sa nahitabo ni Lazaga.
Apan gitataw ni Capanas nga klaro kaayo may dakong kalainan sa pagdakop sa ilang estudyante itandi sa mitahan nga suspetsado sanglit gitagoan ang dagway niini samtang kang Lazaga gipakita dayon sa media.
“Dako kaayo og deperensiya, kay kadto si Jed Carlos Lazaga kun nag-inusara ra ‘to ug wala matabangi luoy kaayo ‘to, mahulog ‘tong fall guy... kay kun wala pa nato mapugngi maisyuhan to siya og warrant of arrest pinaagi sa statement nga gihimo-himo ra sa mga polis ug igo rang gipapirmahan sa duha ka mga testigos,” sigon pa ni Capanas.
Tungod niini, si Capanas miingon nga nagplano sila sa pagpasaka og kaso batok sa wala pa mailhing mga tawo nga mikulata ug mipapriso kang Lazaga apil na ang mga polis nga mitumbok niini nga maoy suspetsado sa bombing sa bar exam. Samtang moduso usab sila og sumbong ngadto sa Kapisanan ng mga Brodkaster ng Pilipinas (KBP) Manila labot sa pagpakita sa hulagway ug paghingalan dayon kang Lazaga nga wala gani mi-verify kanila.
Kini tungod kay ilang nakita nga malisyoso kaayo ang pag-akusar kang Lazaga nga gihulagway dayon nga maoy suspetsado sa pagpamomba nga wala gani mopahigayon og subsob nga pakisusi.
Gipasaka na kagahapon ang kaso batok kang Nepomuceno ug laing duha ka wala mailhing kauban. (BANAT)