Brgy Kapitan Rubio nagpasalamat

CEBU, Philippines - Gipasalamatan ni Barangay Kapitan Nelson Rubio sa barangay Umapad, dakbayan sa Mandaue ang tanang nagsuporta sa iyang kandidatora nga maoy nagdala kaniya sa kadaugan sa miaging piniliay.

Si Rubio miingon nga ang iyang kadaugan ihalad niya sa tanang molupyo sa ilang barangay sanglit ang iyang pagpangalagad gitumong man alang sa kaayohan sa tanang katawhan.

Matud pa niya nga ang mga proyekto nga wala matagamtami sa katawhan sa barangay Umapad sa milabay’ng katuigan iyang paningkamutan nga hingpit nga ikahatod ngadto sa katawhan sa barangay.

Kini maoy iyang bugti sa gihatag nga pagsalig sa katawhan sa barangay Umapad kaniya.

Midugang siya nga ang sinsiro ug matinud-anon nga pagserbisyo sa walay pagpihig niyang pangalagad iyang ibubo sa barangay sanglit alang man sa tanan ang iyang serbisyo.

Dugang pa niya nga kun unsa man ang wala ikahatag nga mga kaayohan sa miaging administrasyon iyang paningkamutan nga sa iyang panahon kahatagan na kini og katumanan.

Naglakip na niini ang pagbaton og kaugalingong ambulansiya nga makahatag og dinaliang pagtubag sa higayon nga adunay masakiton nga ihatud sa tambalanan, palig-onon ang kahapsay ug kalinaw, pagpasiugda og mga programa sa senior citizen.

Ang pagbaton og   mini bus, mini firetruck, atimanon ang drainage program, magtukod og barangay tanod outpost, mga waiting shade, movable stage ug birthing center alang sa manganak nga kababayen-an iyang ipatuman, matud pa ni Rubio. (BANAT)