CEBU, Philippines - Namatay ang usa ka mananagat nga dili kamao molangoy human kini malumos samtang nag-inusara sa pagpamasol didto sa kadagatan sa Sitio Lubi ,barangay San Roque, lungsod sa Asturias niadtong Miyerkules sa alas 10:30 sa buntag.
Siya mao si Porseso Bayonita Gomiloy, 75 , minyo, nga taga barangay Tubod sakop sa maong lungsod.
Si Insp. Danilo Santillan, hepe sa Asturias Police mibutyag sa Banat News nga ang biktima nag-inusara nga namasol niadtong Miyerkules sa kaadlawon sa taga liog nga giladmon nga tubig.
Apan nianang pagka adlawan na nabangalan na kini sa laing mananagat nga si Julito Tinggal, hingkod, nga taga Tubiga’g Manok sa mao gihapong lungsod, nga naglutaw nga nagkulob sa dagat.
Dali niya kining gireport sa kapolisan ug sa pag-respondi sa mga otoridad, nasuta nga patay na kini ug gikonpirmar sa municipal health officer nga pagkalumos ang hinungdan niini.
Dugang nahipos nga impormasyon sa kapolisan mao nga dili diay kamao molangoy ang maong mananagat.
Namatikdan usab sa mga molupyo sa maong lugar nga kanunay managat ang biktima sa taga hawak lang ang giladmon sa dagat. (BANAT)