CEBU, Philippines - Naglaraw si Mayor Michael Rama nga mogama og barangay environmental office aron hingpit na nga ma-implementar ang mga kasamtangang pamaagi sa ecological solid waste management .
Matud pa sa mayor nga kinahanglan nga makigdugtong na gyud ang mga opisyal sa barangay sa mga environmental program nga gisabak sa siyudad.
Ang mga tawo kinahanglang motuman sa mga gimbuhaton sa City Environmental Sanitation Enforcement Team (CESET).
Nagkanayon ang mayor nga matag barangay may lima ka mga barangay environmental officer nga makadawat usab og tag P1,500 matag buwan nga honorarium.
Dugang usab ni Rama nga kinahanglan gyud nga iimplementar ang City Ordinance 2031 nga nailhan usab nga Solid Waste Management Act ug usa ang CESET maoy mosusi niini.
Ubos sa maong ordinansa, kinahanglan nga buwag-buwagon gyud sa molupyo ang ilang basurahan, aron lainon ang malata ug dili malata.
Gidili usab nga magpundo og mga basurahan sa gawas sa ilang balay kung wala pay schedule sa koleksyon niini.
Pipila sa mga sakop sa CESET naglangkob kanila ni city consultant Nestor Alonso, Cebu City Division School Superintendent Rhea Mar Angtud, DepEd-7 Director Recaredo Borgonia, Vice-Mayor ug Chairman sa Committee on Education Joy Augustus Young ug ang kasamtangang manager sa Cebu City Sports Center nga si Ricardo Ballesteros Jr. (BANAT)