Government center sa Mandaue tukoron

CEBU, Philippines - Naningkamot si Mayor Jonas Cortes sa dakbayan sa Mandaue nga matukod ang usa ka government center nga subay sa plano sa Mandaue 2020.

Ang nagdesinyo niini mao ang mga tinun-an sa arketikto sa University of San Carlos (USC) ug ilang gipresentar ngadto sa mga negosyante sa Mandaue sa miaging adlaw.

Sa maong plano ug desinyo gilakip ang pag-ayo ug pagpalambo sa Cansaga River nga naglapuslapos sa Mandaue ug Consolacion, Bantayan sa Hari ug sa basurahan sa barangay Umapad.

Si Mayor Cortes miingon nga gikinahanglan kaayo sa Mandaue ang usa ka government center nga kabutangan sa bag-ong City Hall ug mga buhatan sa kagamhanan sa maong dakbayan.

Matud pa niya nga andam nga mogahin og salapi ang kagamhanan alang sa maong plano sanglit iyang nakita ang kamahinungdanon niini.

Gipasabot niya nga karaan na ang edipisyo sa city hall karon ug naghuot na ang nagkalainlaing buhatan sa kagamhanan sa dakbayan nga nag-okupar niini,

Gitataw niya nga iyang awhagon ang konseho sa paggahin og salapi alang sa maong proyekto.

Si Cortes miingon nga kun kahatagan og kahigayonan nga matukod ang bag-ong city hall, ang kasamtangang edipisyo niini himoon na lamang unya nga museum sa dakbayan.

Samtang si Eric Mendoza nga maoy presidente sa Mandaue Chamber of Commerce and Industry (MCCI) mipasabot usab nga ang pagkabig sa mga kapitalista sa dakbayan nga mobutang sa ilang negosyo diha, sayon ra kun may maayong representasyon ang kagamhanan sa pagkombinser kanila. (BANAT)