Mga eskuylahan pahinlo-an sa mayor

CEBU, Philippines - Giawhag ni Mayor Michael Rama ang publiko nga mobuluntaryo sa pagpanglimpiyo sa mga tulunghaan nga   maoy gigamit sa bag-ohay pang nahuman   nga eleksyon sa barangay ug Sangguniang Kabataan.

Matud pa ni Rama nga dili siya ganahan nga ma-problema unya ang mga tinun-an sa pag-atubang og mga basura inigbalik nila sa klase.

Dili pa lang dugay, gimandoan na usab ni Rama ang mga  sakop sa Department of Public Services (DPS) ug Cebu Environmental Sanitation Enforcement Team (CESET) nga mohimo og dinalian nga pagpalimpiyo sa mga tulunghaan nga napuno sa mga campaign material sa eleksyon sa miaging Lunes.

Sa pagkakaron , ang mga tulunghaan maoy unang target sa CSET ug DPS apan karong Sabado, sugdan na nila ang dinagko nga pagpanglimpiyo sa kadalanan ilabi na sa paglangkat sa mga streamer, poster ug uban pa nga campaign material.

Samtang nasayran sa Banat News, nga gisugdan na ang Guadalupe Elementary School sa pagpanglimpiyo kagahapon ingon man usab ang katupad niini nga Ramon Duterte Memorial National High School. (BANAT)