CEBU, Philippines - Hingpit na nga gipasakaan og kaso nga pagpanulis ug paghupot og kutsilyo si Michael Labora ug laing tulo ka mga kauban niini nga mitulis sa Banco Maximo sa dalan A. del Rosario sa barangay Guizo, dakbayan sa Mandaue sa miaging semana.
Si Labora unang gipasakaan og kaso nga paghupot og kutsilyo nga nasakmit sa mga sakop sa Investigation Detection and Management Bureau (IDMB) ug gisunod usab sa pagpasaka kaniya ang kasong robbery nga naglakip sa tulo ka mga kauban nga nagdala sa mga pangalan nga John Do.
Matud pa ni Inspector Ramil Morpos, hepe sa Investigation Division sa Mandaue City Police Office (MCPO) nga nahinabi sa Banat News nga ilang gipasaka ang kasong robbery kang Labora human usab siya positibong giila sa mga saksi sa pagtulis nila sa bangko.
Si Morpos miingon nga lakip sa ilang ebedinsiya sa kaso nga ilang gipasaka ang Honda nga motorsiklo nga kolor itom nga giluwanan sa suspetsado atol sa ilang pagsikop niini.
Gipasabot ni Inspector Morpos nga kasamtangang John Do lamang ang ilang gibutang nga mga ngalan sa tulo ka mga suspetsado sanglit nagpabilin pa man nga wala nila mailhi hangtod niining panahona. (BANAT)