CEBU, Philippines - Human nagmalampuson ang kapolisan ug kasundalohan sa pagpatunhay sa kahusay'g kalinaw sa milabay’ng eleksyon niadtong Lunes, nagpadayon gihapon silang alerto nunot sa nagsingabot nga kasaulogan sa Kalag-kalag karung Lunes ug Martes.
Si Sr. Supt. Josephus Angan, Chief of Staff sa Police Regional Office-7 nagkanayon atol sa Talakayan sa Isyung Pulis (TSIP) diha sa media center sa ilang regional headquarters, ilang gimandoan ang tanang city ug provincial director nga ipadayon ang pagpahigayon og checkpoint hangtod mahuman ang Comelec gun ban unya sa Nobiyembre 10.
Gipahibawo sa kadagkoan sa PRO-7 nga sukad magsugod ang gun ban nakadakop na sila og 86 nga naghupot og dili lisensyadong armas, tulo niini mga polis, 36 ka high powered ug 47 ka low powered firearms, samtang 56 ang napasaka nga kaso ug 22 nga ubos sa imbistigasyon.
Ang mga nadakpan nga polis ug nakuhaan og armas mao sila si FO1 Joseph Lanaman sa lungsod sa San Fernando, PO1 John Jamilton Tapa kinsa nadakpan sa usa ka videokihan sa dalan Sanciangko ug SPO1 Giogines Carrillo.
Sa iyang bahin si Sr. Supt. Erson Digal, director sa CPPO miingon nga iyang gimandoan ang tanan niyang chief of police nga padayong mohimo’g checkpoint hangtod mahuman ang election period.
Iyang gipahibawo nga human sa eleksyon niadtong Lunes ang uban nga augmentation gikan sa Regional Public Safety Batallion ug Regional Training School iya nang gipabalik sa ilang unit.
Hinuon si Digal nagkanayon nga andam na sila sa pagpatuman sa kahusay'g kalinaw sa umaabot nga kasaulogan sa Kalag-kalag.
Matud niya nga iyang gimandoan ang tanan niyang sakop nga hugtan ang pagbantay sa mga pantalan, sama sa pantalan sa Liloan, Santander, Hagnaya, San Remegio, Danao, Toledo, Tangil Dumanjug ug uban pang exit point aron masigurong walay makalusot nga mga tawong magdala og kontrabando.
Lakip sa pabantayan ni Digal mao ang mga terminal nga destinohan niya og polis ingon man K-9 dogs nga maoy mosimhot sa mga bagahe sa mga pasaherong mosulod sa terminal diha sa South Bus ug North Bus terminal. (BANAT)