Maestra makakiha sa kandidato

CEBU, Philippines – Gipahibawo sa regional nga buhatan sa Commission on ElectionS (Comelec) nga ang mga magtutudlo nga miyembro sa Board of Election Inspectors (BEIs) mahimong makapasaka og kaso batok sa mga kandidato nga nangasaba kanila atol sa eleksyon sa barangay ug SK niadtong adlaw nga Lunes. Mao kini ang tambag ni acting Comele regional director Veronico Petalcorin ngadto sa mga mireklamong mga magtutudlo sa publikong tulunghaan sa mga barangay sa dakbayan sa Mandaue ug sa dakbayan sa Sugbu diin may mga kandidato ang minawong sa pag-akusar sa mga public school teachers nga mipabor sa kandidato sa pagkabarangay kapitan nga ilang kaatbang. Matud pa ni Petalcorin sa interbyu sa DyRF nga ang Comelec andam nga motabang sa mga magtutudlo sa pagpangita og abogado aron makapangabugar kanila sa maong kaso.

Sigon pa ni Petalcorin nga mahimong sa buhatan na mismo sa Comelec masang-at ang maong sumbong aron ang ilang legal division sa Manila mao na ang mohimo og tukmang aksyon.

Samtang gipahibawo usab ni Petalcorin nga mahimo usab nga makapasaka og kaso ang mga magtutudlo ngadto sa mga kandidato nga gidudahan nilang maoy mituyo pagputol sa kuryente aron mabalda ang pag-ihap sa mga balota pagtuis sa resulta sa election sanglit usa kini ka dakong kalapasan sa balaod.

Apan iyang gitataw nga magkinahanglan hinuon og lig-ong ebidensiya nga magtudlo aron ilahang mapadayon ang kiha. - Chester Abadilla (BANAT NEWS)