Hepe Ipapatay Unta

CEBU, Philippines - Ang hepe sa lungsod sa Medellin mibutyag nga siya maoy tuyo nga ipapatay sa kontrobersyal nga kapitan sa maong lungsod nga nalambigit sa ginadiling drugas sukad pa niadtong milabay’ng tuig ug niadtong milabay’ng semana lang subling nautingkay.

Sa pakighinabi sa Banat News kang Chief Inspector Bonifacio Arriesgado mibutyag kini nga gibaharan siya kaniadto ni kanhi Kapitan Marianito “Manit” Yaun human mabasahi sa naulahi sa usa ka pamantalaan nga iyaha kining gihinganlan nga usa ka druglord sa milabay’ng tuig.

Matud ni Arriesgado nga wala gyud siya mohingalan nga druglord si Yaun ug igo lang siya nga mibutyag ngadto sa mga sakop sa media nga nakadawat lang siya og impormasyon nga si Yaun tigpakatap og ginadiling drugas sa Medellin.

Tungod niini, sumala pang Arriesgado nga gitawgan siya ni Yaun sa telepono ug gihulga siya pinaagi sa pag-ingon nga kinahanglang mag-amping kini kay ipapatay siya niini.

“Pagbantay kay ipatira tika kung gusto nimo magbagat ta,” sumala pa ni Yaun kaniya matud pa ni Arriesgado, sumala pa niini gipa-blotter niya kini sa Daanbantayan police station sanglit didto siya sa ilang balay sa maong lungsod dihang nadawat ang tawag.

Isip hepe sa kapolisan wala mosibog si Arriesgado sa hagit ug giawhag si Yaun sa pag-adto sa ilang buhatan apan wala mosanong niini ang suspek.

Dugang pa ni Arriesgado nga adunay usa ka concerned citizen nga mi-text kaniyang nagpahibalo nga si “Manit”(Yaun) nagbahas-bahas sa Medellin ug nangita kaniya. Matud pang Arriesgado gisundan kini og tawag sa telepono sa amahan mismo ni Jojo Arriesgado nga nagpahibalong ang naulahi (Jojo) gi-hire ni Yaun aron siya ipapatay.

Dugang pa ni Arriesgado nga dihay higayon nga gipatawag siya ni Medellin Mayor Ricardo Ramirez kaniadto tungod sa nadawat niini nga reklamo gikan sa usa ka tawong adunay utang kang Yaun. Giingong mireklamo ang midangop sa mayor nga gipabuthan siya ni Yaun og armas tungod kay napalta siya pagbayad sa iyang utang.

Si Arriesgado mi-apply dayon og search warrant aron susihon ang balay ni Yaun pagsuta kun duna ba kini armas niadtong Pebrero 2 ning tuiga nga miresulta sa pagkakuha sa mga drug paraphernalia , armas ug bala ingon man granada.

Sumala pang Arriesgado nga P50 mil ug usa ka motorsiklo ang gitanyag nga patong sa iyang ulo ni Yaun. Apan niadtong milabay’ng Domingo sa gabii nagkabingkil sila si Jojo ug Yaun.

Matud pang Arriesgado nagduda siyang gisukmatan ni Jojo si Yaun sa gisugo niining pagpapatay kaniya nga hangtud karon wala pa mahitabo hinungdan nga ang duha nagkapinusilay ug gilabayan og granada ni Yaun si Jojo.

Si Jojo ilang gidakop diha sa Daanbantayan District Hospital samtang nagpaalim sa samad pinusilan sa bitiis. Matud pang Arriesgado dili lang siya ang gihulga ni Yaun sanglit hasta ang ilang mayor ug laing barangay kapitan ang giingong target usab niini. Si Yaun padayon pang gipangita sa kapolisan gumikan sa duha ka warrant of arrest niini ug ingon man ang uwahing insidente niadtong Domingo sa gabii sulod sa panimalay sa usa ka Jessie Cabucos. (BANAT NEWS)