Teddy O. mihimakak nga nangulata'g tanod

CEBU, Philippines - Kusganong gipanghimakak ni Provincial Board member Thadeo ‘Teddy’ Ouano ang pasangil nga siya nangulata og usa ka kandidato sa pagkakonsehal sa barangay Opao sa siyudad sa Mandaue atol sa election sa barangay ug Sangguniang Kabataan election kagahapon sa buntag. Matud pa ni Ouano nga nahingangha siya nga gipasanginlan siyang nangulata kay wala gyud siya migawas sa iyang balay kagahapon sa buntag hangtud na sa pagkaudto.

Si Ouano nagkanayon nga imposible kaayo siyang mangulata bisan usa lamang ka molupyo sa barangay Opao sanglit mao kining barangaya nga kanunay niyang gisaligan sa tanang eleksyon kay dinhi man kini magpuyo.       

Matud pa ni Ouano nga posibleng ang maong pasangil batok kaniya nagagikan sa iya ra sad igsuon nga si Opao barangay kapitan Juvita “Joy” Ouano.

Si Ouano ug giingong bodyguard niini ang gipasanginlang mikulata sa upat ka mga barangay tanod sa barangay Opao   kagahapon sa kaadlawon.

Ang namasangil mao sila si Joselito Sison, 48, Epefanio Barientos, 51, Vevencio Murillo, 51 ug Jerson Montibon, 46 anyos nga giingong mga barangay tanod sa maong dapit.

Si SPO2 Danilo Ibarreta sa Presinto 5 sa Opao Police Station nagkanayon nga mialegar ang mga tanod nga nahitabo ang pagpangulata sa dalan Cabahug.

Sumala pa sa upat nga luwan si Ouano sa kolor itom nga pickup nga may plakang ZHT-438 ug gihunongan sila dayon nanaug si Ouano ug bodyguard niini nga giila lang sa pangalan nga Frankie ug mikulata kanila sa walay igong hinungdan. (Romeo Limpangog ug Chester Abadilla) (BANATNEWS)