Giselosan gidunggab angol
CEBU, Philippines - Usa ka 21 anyos nga lalaki nga gikan naghatod sa iyang hinigugma gidunggab sa giilang “siga” sa Lower San Roque sa barangay Calamba ning siyudad kagahapon pasado alas 4:00 sa kaadlawon.
Ang biktima kinsa nahiagom og samad dinunggaban sa iyang ubol-ubol giila sa kapolisan nga si Noel Dino, 21, ulitawo, walay trabaho, nga taga sitio Almasin, Calamba.
Samtang ang suspetsado naila lang sa ngalang “Lapad”, o “Siga” sa laing angga kaniya sa maong lugar.
Sa pasiunang imbestigasyon ni SPO2 Roger Nedamo ug mga kaubanan sa homicide section sa Cebu City Police Office nagbutyag ang biktima uban sa iyang hinigugma namainit og “poto ug sikwate” sa usa ka painitan sa maong lugar.
Matud sa biktima nga human sila mamainit iyang gihatod sa ilang balay ang iyang hinigugma nga si Mary Ann Velos dayon mibalik siya sa agi aron mopauli sa ilang pinuy-anan.
Apan samtang siya naglakaw iyang namatikdan nga gisundan siya sa suspek, ug kalit lang siyang gihansakan sa mahait nga hinagiban sa iyang ubol-ubol ug dayon nakasiyagit siya nga “Ayaw Pad”, ug midagan siya paingon ngadto sa Calamba.
Ang biktima nga nasamdan, daling gidala sa iyang hinigugma ngadto sa Cebu City Medical Center.
Nagtuo ang kapolisan nga nagselos ang suspek ngadto sa biktima, gawas niini laing anggulo ang gisubay karon mao ang posibleng atraso ang hinungdan sa pagpanunggab. (BANATNEWS)
- Latest
- Trending
