Hubog nagtangkil ingram priso

CEBU, Philippines - Gidakop ug gibalhug sa bilanggoan ang usa ka empleyado sa lungsod sa Carmen human kini nagbahas- bahas sakay sa iyang motorsiklo nga gikatahong hubog nga naghukas lang ug nakasambilay og ingram didto sa barangay Dawis Norte, sa lungsod sa Carmen alas 11:15 niadtong Domingo sa gabii nga maoy bisperas sa adlaw sa barangay ug SK election.Ang nadakpan sa kapolisan mao si Achilles Hermoso Morales, 55, minyo, nga taga barangay Dawis, ug environmental guard sa munisipyo sa lungsod.

Si SPO2 Renerio Masocol, imbistigador sa Carmen Police dihang nahinabi sa Banat News mibutyag nga ang election officer sa lungsod nga si Patricia Sitoy maoy nakadiskobre sa maong kawani nga nagdaladala og armas nga hubog.

Kini human siya magpahatod sa patrol car sa kapolisan sa lungsod nga gimaneho ni PO2 Dario Baguio paingon sa ilang balay sa siyudad sa Mandaue.

Matud pa ni SPO2 Masocol nga nasundan sa maong election officer ang motorsiklo nga gisakyan ni Morales nga walay senina ug lasbag kaayo nga nagtangkil sa ingram.

Daling gipadakop ang suspetsado ug gibalhug dayon sa karsel tungod sa paglapas niini sa Comelec gun ban.

Matud ni SPO2 Masocol nga may sulod nga 20 ka bala ang   magazine sa ingram nga gisalig-ay ni Morales busa gihikay dayon ang tukmang kaso nga ipasaka batok kaniya kalabot sa pagdala og high powered firearm ug sa Comelec gun ban.  (BANATNEWS)