CEBU, Philippines - Usa ka Korean national nawagtangan og dakong kantidad nga salapi human mahibilin sa taxi nga iyang gisakyan ang bag nga iyang gisudlan niini sa miaging gabii.
Ang biktima mao si Ricky Yun, hingkod, nga temporaryong nagpuyo sa baranggay Gabi sa lungsod sa Cordova .
Matud pa PO2 Calixto Botanan sa Mandaue City Police Office nga ang biktima gikan pa sa Maria Luisa Village sa dakbayan sa Mandaue.
Unya nagpahatod kini og taxi ngadto sa barangay Gabi sa Cordova ug sa pag-abot sa maong dapit nanaog dayon siya gikan sa taxi pagkahuman niya og bayad sa plete.
Nakalimtan niya ang supot nga iyang gisudlan sa iyang salapi didto sa sulod sa taxi nga mikabat sa $20,000 .
Matud pa ni PO3 Botantan nga hinuon nakuha sa biktima ang plate number sa maong taxi nga mao ang GSN 381 nga gimaneho usab sa wala pa mailhing drayber.
Si PO3 Botatan miingon nga dihang gi-follow-up sa biktima, nakuha niya ang sobre nga gisudlan sa iyang kuwarta, apan kuwang na og $1,700. (BANATNEWS)