Duha ka brgy sa San Fernando gibantayan

CEBU, Philippines - Duha ka barangay sa lungsod sa San Fernando pahugtan sa pagmonitor sa kapolisan karong adlawa aron malikayan ang unsa mang kagubot human hisayri nga may mga supporter sa pipila ka mga kandidato nga nag-inawayay.

Si Inspector Carlos Reyes Jr., hepe sa San Fernando Police Station nga nahinabi sa Banat News kagahapon mibutyag nga ang barangay Balungag usa sa bukirang barangay sa San Fernando ug ang barangay Panadtaran usa sa kapatagang barangay maoy ilang monitoron pag-ayo karong adlawa.

 Matud ni Reyes nga aduna silay nadawat nga taho kabahin sa mga armadong tawo diha sa barangay Balungag.

Ang nahisgutang barangay girekomendar ni Reyes nga usa sa election watchlist area.

Sa barangay Panadtaran ang mga supporter usab sa mga kandidato gikatahong nagkagubot na sumala sa mga report nga ilang nadawat.

Kahinumdoman nga niadtong May 10, 2010 election ang kampo ni kanhi Mayor Lakambini Reluya ug Mayor Antonio Canoy nagkainitay hangtod nga misangpot sa hukmanan ang maong bangi.

Ang San Fernando gilangkuban sa 21 ka mga barangay ug matud ni Reyes nga 13 ka mga polis gikan sa Regional Training School ug Provincial Mobile Group ang gidestino karon sa maong lungsod alang sa eleksiyon karong adlawa.

Gawas niini aduna pay mga sundawo nga sakop sa 78 Infantry Battalion ang ipakatap usab sa maong lugar.

Sa laing bahin, si Superintendent Anthony Bagarinao, hepe sa Naga Police Station sa pakighinabi sa Banat News kagahapon nagkanayon nga wala pa silay nadawat nga report bahin sa kagubot nga may labot sa eleksiyon sa barangay karon.

Sa milabay’ng piniliay sa nangaging katuigan may mga kaguliyang nga nahitabo sa Naga .

Matud ni Bagarinao 20 ka mga polis nga gikan sa RTS ug PMG ang gidestino sa Naga alang sa eleksiyon karong adlawa. Ang nahisgutang mga polis ipakatap sa kabarangayan diin ipahigayon ang botasyon. (BANATNEWS)