CEBU, Philippines - Ang kontrobersyal nga kapitan sa lungsod sa Medellin nga gipasanginlang nalambigit sa ginadiling drugas gipasanginlan na usab nga nakigpinusilay ug mipabuto og granada sa usa ka panimalay sa iyang higala pasado alas-2 sa hapon kagahapon sa barangay Antipolo lungsod sa Medellin.
Si Marianito Yaon giingong nakigpinusilay sa usa ka Jojo Arriesgado tungod sa wala pa masayring hinungdan sumala pa ni Chief Inspector Bonifacio Arreisgado nga gikahinabi sa Banat News kagahapon. Si Arriesgado mibutyag nga base sa ilang nakuha nga impormasyon adunay nakakita kang Arriesgado (Jojo) nga naggukod kang Yaon apan nakaipsot kini.
Tungod niini gikuha ni Jojo ang motor ni Yaon ug gipusil ug nasunog.Sumala pang Arriesgado nga sa wala pa ang ginukdanay tali nila ni Jojo ug Yaon nag-abot ang duha diha sa panimalay sa usa ka Jessie Cabucos ug giingong may nadungog nga buto-buto sa armas ug usa ka lanog nga buto nga gidudahang granada sa maong balay.
Matud pa ni Arriesgado nga sa ilang pakisusi sa maong panimalay ilang nakuha ang usa ka gituohang pin sa granada. Nakadawat og impormasyon si Arriesgado nga naangol si Jojo hinungdan nga ilaha kining gisusi sa Daanbantayan District Hospital. Ilang nasayran nga ninglayas didto si Jojo ug ang gigamit nga pangalan Junjun Pilapil ug dihang ilang naabtan ilaha kining gidakop.
Ang kapolisan wala pa makatuhop sa motibo sa pinusilay sa duha apan nagduda silang pulos kini may kalambigitan sa ilegal nga drugas. Samtang aduna nay warrant of arrest si Yaon nga no bail hinungdan nga ilaha usab kining gipangita. (BANATNEWS)